လူ့အခွင့်အရေးဖောက်ဖျက်ခံရပါက မြန်မာနိုင်ငံအမျိုးသားလူ့အခွင့်အရေးကော်မရှင်သို့ တိုင်ကြားနိုင်
628
Pearl (NP News) - ဖေဖော်ဝါရီ ၂၁
နိုင်ငံသားတစ်ဦးသည် ဖွဲ့စည်းပုံ အခြေခံဥပဒေပါ နိုင်ငံသားများ၏ မူလ အခွင့်အရေးနှင့် ဥပဒေပါ အခွင့်အရေးများ၊ နိုင်ငံတော်ကလက်ခံထားသည့် လူ့အခွင့်အရေးနှင့်သက်ဆိုင်သော အပြည်ပြည်ဆိုင်ရာနှင့်ဒေသဆိုင်ရာသဘောတူစာချုပ်များတွင် ပါရှိသည့် လူ့အခွင့်အရေးများကို ဖောက်ဖျက်ခြင်းခံရပါက မြန်မာနိုင်ငံအမျိုးသားလူ့အခွင့်အရေးကော်မရှင်ဥပဒေပုဒ်မ ၃ဝ အရ ကိုယ်တိုင်အတွက်သော်လည်းကောင်း၊ အခြားသူတစ်ဦးအတွက်သော်လည်းကောင်း၊ လူတစ်စုကို ကိုယ်စားပြု၍သော်လည်းကောင်း ကော်မရှင်သို့တိုင်ကြားနိုင်ကြောင်း သိရသည်။
တိုင်ကြားမှုကို ဥက္ကဋ္ဌ၊ မြန်မာနိုင်ငံ အမျိုးသားလူ့အခွင့်အရေးကော်မရှင်၊ အမှတ် (၂၇)၊ (၆) မိုင်ခွဲ၊ ပြည်လမ်း၊ လှိုင်မြို့နယ်၊ ရန်ကုန်မြို့သို့လည်းကောင်း၊ မြန်မာနိုင်ငံ အမျိုးသားလူ့အခွင့်အရေးကော်မရှင် (ရုံးခွဲ) နေပြည်တော်၊ မန္တလေး၊ စစ်တွေ၊ ပုသိမ်မြို့တို့ သို့လည်းကောင်း လိပ်မူ၍ စာတိုက်မှဖြစ်စေ၊ သက်ဆိုင်ရာကော်မရှင်ရုံးသို့ လူကိုယ်တိုင် ဖြစ်စေ၊ ဖက်စ် ၀၁၈-၆၅၄၆၇၈၊ ကော်မရှင် e-mail လိပ်စာဖြစ်သော [email protected]. mm တို့မှ တစ်ဆင့်ဖြစ်စေ ပြုလုပ်နိုင်ကြောင်းလည်း အသိပေးထား သည်။
တိုင်ကြားရာတွင် တိုင်ကြားသူ၏ အမည်၊ အမြဲ တမ်းနေရပ်လိပ်စာနှင့် ဆက်သွယ်ရန်လိပ်စာ အပြည့်အစုံ (ဆက်သွယ်ရန် ဖုန်း၊ ဖက်စ်နှင့် e-mail တို့ ရှိလျှင် ထည့်သွင်းဖော်ပြရန်) ၊ တိုင်ကြားသူသည် မည်ကဲ့သို့လူ့အခွင့်အရေး ဖောက်ဖျက်ခံရပြီး နစ်နာဆုံးရှုံးကြောင်း ပြည့်စုံစွာဖော်ပြချက်၊ လိုအပ် ပါက မှတ်တမ်းဓာတ်ပုံနှင့် အထောက်အထား မိတ္တူများ ပူးတွဲလျက်ပေးပို့ရန် လိုအပ်ကြောင်း သိရသည်။
ထို့ပြင် တိုင်ကြားသူ၏ နိုင်ငံသား စိစစ်ရေးကတ်ပြားမိတ္တူမဖြစ်မနေ ပူးတွဲပေးပို့ရန်၊ တိုင်ကြားချက်ပါ အကြောင်းအရာများ မှန်ကန်ကြောင်း တိုင်ကြားသူမှ လက်မှတ်ရေးထိုးပေးပို့ရန်လိုအပ်ကြောင်းလည်း သိရသည်။
ကော်မရှင်အနေဖြင့် ယင်းတိုင်ကြားချက် များကိုစိစစ်၍ ကော်မရှင်ဥပဒေ၊ လုပ်ထုံး လုပ်နည်းများနှင့်အညီ စုံစမ်းစစ်ဆေးပြီး သက်ဆိုင်ရာဌာန၊ အဖွဲ့အစည်းများနှင့် ဆက်သွယ်ညှိနှိုင်း ပူးပေါင်းဆောင်ရွက်ပေး သွားမည်ဖြစ်ကြောင်း မြန်မာနိုင်ငံအမျိုးသားလူ့အခွင့်အရေးကော်မရှင်က အသိပေးထားသည်။